ABITURIENT.BY

Падрыхтоўка журналісцкіх кадраў у БДУ пачалася з 1 лістапада 1944 года. Паводле пастановы ЦК ВКП (б) у Мінску быў утвораны першы ў Савецкім Саюзе факультэт журналістыкі (ва ўніверсітэтах Кіева і Масквы аднайменныя факультэты ўзніклі крыху пазней - у 1946 і 1947 гадах адпаведна.) Але спецыялізаваная падрыхтоўка журналістаў у Беларусі пачалася нашмат раней: 1918 - на базе губернскіх партшкол ў Віцебску была адчынена школа журналістыкі, 1920 год - у Мінску з'явіўся Інстытут журналістыкі.

  З 1932 па 1941 журналісцкія кадры рыхтаваліся ў Мінскім Камуністычным інстытуце журналістыкі (КІЖі), з 1935 года - і ў Магілёўскім газетным тэхнікуме.      

  1 лістапада 1944 заняткі на аддзяленні журналістыкі БДУ пачаліся адразу на першым і другім курсах, дзе вучыліся 30 і 11 студэнтаў. Вызвалены Мінск ляжаў у руінах, не было будынку ўніверсітэта, не было яшчэ і факультэта - спачатку заняткі праводзіліся на станцыі Сходня, пасля - у школьных класах Мінска. 

  5 красавіка 1946 г. ўтворана кафедра журналістыкі. Да 1967 будучыя журналісты навучаліся на аддзяленні журналістыкі філалагічнага факультэта БДУ. У 1949 г. адбыўся першы выпуск студэнтаў-журналістаў.  

   Факультэт з кожным годам рос, набіраў сілу. Ствараліся новыя кафедры, з'яўляліся новыя навуковыя напрамкі. У 1965 годзе на базе кафедры журналістыкі былі створаны дзве кафедры: “гісторыі журналістыкі” і “тэорыі і практыкі журналістыкі”. Кафедра тэорыі і практыкі журналістыкі пасля стала называцца кафедрай тэорыі і практыкі савецкай журналістыкі. У 1968 годзе была створана кафедра тэлебачання і радыёвяшчання. У 1969 аснавана кафедра стылістыкі і літаратурнага рэдагавання. У 1984 г. была створана кафедра замежнай журналістыкі і літаратуры. У 80-я гады на журфаку функцыянавалі 5 кафедраў, фота-, тэле- і радыёлоабараторыі. Мадэрнізацыя навучальнага і навукова-даследчага працэсу на факультэце, абумоўленая новымі перспектывамі развіцця журналістыкі, патрабавала павелічэння колькасці кафедраў як цэнтраў навуковай, вучэбнай, метадычнай і выхаваўчай працы. 

  Новыя магчымасці адкрыліся перад факультэтам журналістыкі ў другой палове 90-х гадоў. Старэйшая і, на працягу многіх дзесяцігоддзяў, адзіная ў рэспубліцы школа журналісцкіх кадраў перабудавала сваю работу ў адпаведнасці з задачамі па стварэнню нацыянальнай інфармацыйнай прасторы, вялікімі структурнымі і значнымі змястоўнымі змяненнямі ў СМІ.   

  У 1998 годзе на факультэце працавала ўжо восем кафедраў. Былі ўтвораны кафедры перыядычнага друку, сацыялогіі журналістыкі, літаратурна-мастацкай крытыкі, у 1999 годзе - кафедра тэхналогій камунікацыі. А ў 2005 годзе пачала сваю працу дзевятая кафедра - кафедра тэорыі і метадалогіі журналістыкі.

  Амаль 90% кіраўнікоў і супрацоўнікаў нацыянальных СМІ - выпускнікі факультэта журналістыкі БДУ.   Факультэт журналістыкі Беларускага дзяржаўнага універсітэта з 1 верасня 2008 ператвораны ў Інстытут журналістыкі БДУ.

Падрыхтоўка спецыялістаў на факультэце журналістыкі Інстытута журналістыкі БДУ сёння ажыццяўляецца па наступных спецыяльнасцях:

1-23 01 08-01 Журналістыка (друкаваныя СМІ)

Спецыялізацыі: Перыядычны друк, дзейнасць інфармацыйных агенцтваў, фотажурналістыка;

1-23 01 08-02 Журналістыка (аўдыёвізуальная)

Спецыялізацыі: тэлежурналістыка, радыёжурналістыка;

1-23 01 08-03 Журналістыка (вэб-журналістыка)

Спецыялізацыі: вэб-журналістыка;

Журналістыка (менеджмент СМІ) 1-23 01 08-04;

1-23 01 09 Журналістыка міжнародная

Спецыялізацыі: міжнародная журналістыка і палітыка, міжнародная журналістыка і эканоміка;

1-23 01 07-01 Інфармацыя і камунікацыя (тэхналогіі камунікацыі)

Спецыялізацыі: аўдыёвізуальная інфармацыя і камунікацыя, інфармацыя і камунікацыя ў сістэме грамадскіх сувязей, рэкламная інфармацыя і камунікацыя;

1-23 01 10-02 Літаратурная праца (рэдагаванне)

Спецыялізацыі: літаратурнае рэдагаванне;

1-23 01 10-03 Літаратурная работа (творчасць)